ايه دنيا

مليان الكون مليان امثال ناس عالقمه وناس فى الديل

ياما فيك يا زمان اشكال والوان ناس م الحرمان بتقاسى الويل

لبياضهم لون ونهارهم ليل ويادوب الدوب عايشين بالحيل

مايشوفوا ربيع وحياه بتضيع مايشوفوا النور من حتى هلال

عايشين مجاريح مجاريح بصحيح شايلين الهم تلال وتلال

ولا حدش حس ولا شاف ولابص ولا قال عن حالهم يوم موال

 

           يامافيك يازمان   اشكال والوان من ناس البخت خذلها ومال  

             شايفين اهوال شايلين احمال وضهورهم مالت م الاتقال

             بالدسته عيال وعيال لعيال لاحيلتهم بيت ولاغيط   ولامال

               ايام بتفوت طافحين الكوت مابتملك  شىء الا الاهمال

مابيكفى القوت م الجوع حتموت

عايشين والحال على قد الحال

  صابرين وجمال صامدين و جبال 

ولا تسمع قول من بين شفايفهم يوم يتقال

            ولاحدش حس ولاشاف ولا بص  ولاقالش فى يوم عنهم موال

              ياما ويا الريح راحت  مجاريح  ضاعت احلامها وامانيها

             كتموا الاحساس  ماشتكوا للناس  شكواهم مين يسمع فيها

              عارفين الناس  وقلوب الناس      مليانه وفيها ما يكفيها

              عاشوا المساكين ايام وسنين      قصتهم و لا حد راويها

            ولاحدش حس  ولاشاف ولا بص  ولاقال عن حالهم يوم موال

 

             ياما ويا الليل فيه ناس بتبات  مش لاقيه الفرش اللى بتحتاج

                    وتبات بتئن ولا حد يحن ولا ايد بتقدم ليها علاج

             مش عايزه تزن وسابوها ترن  وبتدعى المول  يجيب افراج

             والعيا بيهد مش راضيه تمد  فى اديها لغيرها  من الاحراج

             ولاحدش حس ولا شاف ولابص   ولاقال عن حالهم يوم موال

 

ملايين نايمين على ارض بلاط  وغطاهم كان بس حصيره

وعيون باكيين  ولا فادش عياط  عين وبصيره ايد وقصيره

لله شاكيين من غير اصوات  ولاهم طاليبن  غير تصبيره

وياريت لاقيين  من قلب حنين ولا حتى دموع عين الصيره

ولاحدش حس ولا شاف ولابص ولاقال عن حالهم يوم موال

 

ودى ناس بتعيش ربك مارضيش  غير يديها كل ما تحتاج

هو الرزاق وبدون تحويش    اموالها بتملا جميع لدراج

ورمالها كنوز  ابخات وحظوظ  عايشين ومزاجهم احلى مزاج

من غير ماتعوز فى مسابقه تفوز  وبيخسر دايما المحتاج

وزمانها ودود وكمان ميت عود  فى عنيك ياحسود

لو شفت دجاجها  مش اى دجاج

فى دهب بيبيض  لو حتى مريض

والبيض شغال امواج امواج

وبتعمل بيه معلقه للبيه  الطفل عشان ينسى الازعاج

علشان يتربى  زى الكبّه   وهى فى بقّه بدال العاج

ملحوظه  1

اناعندى معلقه صاج

           وف قلب القصر بتلاقى موجود خدام م البيض وخدم م السود

وحشم و عبيد  من ساحل العاج

ولاحدش حس  ولاشاف ولابص  ولاقال عن حالهم يوم موال

وادى ناس بتعيش اكلها تحابيش ولحوم وطيور وكبد عصفور

ودنادى بريش  اومن غير ريش  كفيار وسيمون  وفيميه

وحاجات ما عرفش انا ايه  انا بسمع كدا بس مادقتوش

والحلو ياميش وعصيروخشاف وفروته سلاط

ملحوظه 2

انا ماعرفشى غير خضره سلاط

واخدها ساعات كدا بالشروه

وابويا لحد ما سابنا ومات

كان خايف يمسك ابو فروه  !! انتهت الملحوظه

واللوز والجوز  بين الوجبات  منجه وتفاح   مايضرش هات

وتعالى ياتوتوشويه نخش  نتفرج حبه ايه فى الدش

هات الروموتات هات القنوات  هات لنا واحده فيها الفايده

ابعد ايدك عاللى مش

اما النوم  والتأييل ماتقولليش  فى سرير كرانيش

ومخدات ريش   والقطن سفنج    بتنام وكأنك واخد بنج

والاوضه تلف  و العقل فاضل له دقيقه ويخف

عن اذنك بس   دقيقه ونص  على بال ما تحس

وتشوف وتبص    وتغنى عليهم  كام موال