امثال الجدود والعم

قال الجدود والعم امثال كتير وحكم
من كتر قول الفم حافظ كلامهم صم
وعشان ما يتبخرش هاتوا ورق وقلم
وعشان ما يتنتورش لمُّوا اللى راح يتلم
وعشان ما نتحيرش ارموا اللى فيه الغم
*****
العمر عمر العقل والسن مش بالكم
والشاب شاب القلب والشيبه مش بالهم
والخفه مش في الشكل الخفه جوه الدم 
ان دبلت الورده فيها العبير يتشم
*****

ولكل فول كيال بس أوعى يوم تتخم
فول اتقسم نصين لمين شبيه فى الدم
اردب ما هو ليك ما تجيش في كيله يا عم
الضحكه ليه طالعه صفرا فى لون كركم

*****
السن دا بالسن والبادى الاظلم
والقشه فوق القش ضهر البعير تقسم
واللى عمل يوم خير ما يجيله يوم يندم
واللى النهارده امام  مسيره يوم يتأم

*****
ابعد بعيد ع الشر وغنى له تسلم
والشهره راح تمتد نار فوق العلم
والوز ابنه يعوم لو غرقوه في اليم
دارى الشموع حتقيد نورها يزيد ويعم

*****

من حب ما يكرهش والحب يتنغم
والكُره ما بيدومش والحقد راح يهدم
والحب جوه القلب مش غنوه قالها الفم
سهم الحبيب ما يصيبش لو غرقوه بالسم

*****
الدنيا كاس بيدور يسقينا  فَرْحْ وغم
وجعان في سوق العيش بايت وبيه يحلم
والأكل لجل نعيش والعيشه مش للمم
الدنيا أكل وشرب عند البقر وغنم
واللى بيطبخ سم لازم يدوق السم
*****
عروسه راح  تنزف والناس لها بتتلم
دموعها نازله ترف دى دموع فرح مش غم
لو مات حمار عمده الناس عليه تتلم
ولو يموت هو ما حد بيه يهتم
*****

بيقابلك الصاحب بالحضن يخدك ضم
تضحك لك القوره وكلام جميل الطعم
لكن دى الصوره شايله وراها اللغم
في الوش دا مرايا فى الضهر تلقي السهم