امى الحبيبه
من غربتى
بهدى اليكى سلام خصوص
كتبت لك عنوان ب لحمر
من دم قلبى اللى ملا تَلَتْ كئووس
الدنيا دى لو اساور من دهب
انتى جواها الفصوص
ان جاتنى صورتك في المنام
اتنفض احضن وابوس
واشيل جميلك ع الرؤوس
يا للى اسمك احلى غنوه عرفتها
ودرستها فى كتاب نصوص
وتبان لى صورتك في الزحام
فى كتاب تاريخ ابتسم
وبصبعى أشاور
شايفين يا ناس اهيه مصر
ادى المغول ، وادى التتار
وادى الهكسوس
واسمع في اسمك افتكر
الصافى فيكى والعكر
واللى جحد ، واللى شكر
واللى اعترف ، واللى نكر
واللى م الأوهام سكر
اسمع فى اسمك افتكر
شكل الهرم ، اهل الكرم
لون السما ، طـــين البلـــد
همـس الودع ، عـرق الجدع
واحـد اخترع ، واحـد ابتـدع
واحـد انخدع ، واحـد اتلـدع
وحاجات بدع
صـوت المكن
جــرى التروس ، ضـرب الفئوس
سطو اللصوص
صـمت الامــان ، صـــوت الادان
شمس الصباح ، شبــح الظـــلام
نــــور الفانوس
شكل الطابور ، ساعة الزحام
شدو الطيور ، رقد الحمام
مشى الطاووس ، قرص الناموس
صوت الناقوس ، ضعف النفوس
وحاجات كتير ، كتير ، كتير
تحتاج قاموس
توقيع : ابنك المحروس
ليست هناك تعليقات:
إرسال تعليق